Skietoefeninge

Ons eerste skietoefeninge was êrens in die veld terwyl ons op een of ander kamp was waar dit amper heeltyd gereen het. Wat ek voorheen nie gesê het nie is dat jy, pas uit die skool, ‘n (in ons geval) R1 (geweer) in die hand gestop word. Die moet jy natuurlik naderhand met toe oë kan uitmekaarhaal en weer aanmekaar sit. Dit het ek darem reggekry. Jy mag ook nie in Engels praat van jou “gun” nie dan was jy in groot moeilikheid. (Ek onthou nog die rympie – “This is my rifle and this is my gun. The one is for shooting the other for fun”.)

Die volgende skietoefeninge het plaasgevind buite Voortrekkerhoogte. Ek het in my kop die naam Rashoop maar dink nie dit is die regte plek nie. Ewenwel, ons lê aan op die grond en skiet na die teikens wat ‘n hele ent voor ons opgestel is. Later ruil van ons om met die in die skietgat. Na elke rondte geskietery word die gaatjies op die teiken toegeplak. Die plakkers was gespaar op my teiken!

Ek onthou nie hoeveel punte jy moes kry nie maar ek het dit nie gemaak nie. (Jo-Ann sê van die skietery: (Op ‘n heel ander tyd as ek) “Ek was wild met R4 skiet. Verder as 100 het die ouens ‘n mexican wave in die skietgat gemaak elke keer as ek die teiken raak geskiet het. Gelukkig was ek ‘n penpusher so die oorlog het nie van my skietvermoë afgehang nie.”)

As ek so na Jo-Ann luister was 100 die magiese syfer.’n Hele klomp van ons het dit nie gemaak nie en moes terugloop na VTH. Met die dat ons by die Garrison(?) (die VTH stadsaal) verby loop, is dit omtrent net die tyd vir die aand se film om te begin. ‘n Paar van ons het eers gaan fliek voor ons terug is na die kamp. Ondertussen is daar al voertuie uitgestuur om ons te gaan soek. Ons storie was maar dat ons die ander pad geloop het.

Opleiding

Ons is opgelei in verskeie goeters. Ek kan net onthou van die radio operateurs, die “battery bashers” en die drywers.
My eerste kursus van ses weke was radio operateurs opleiding. Ons leer van tweerigting radios, opstel van antennae, radiotaal en allehande ander goed.
Gedurende die tyd gaan die “drywers” vir omtrent ‘n week op pad oefen. Op een of ander manier ry ek saam as radio operateur om kontak met die basis te behou. Ons is die oggend weg uit Voortrekkerhoogte en ek het saam met ‘n Luitenant en ‘n Korporaal in hulle Landrover gery. Twee uur die middag moes ek kontak maak op een van die frekwensies waarop vooraf ooreengekom is. Die beste wat ek kon kry was om die basis te hoor maar ek dink ons was te laag of my radiolugdraad was te kort vir hulle om my te hoor. Met die volgende afgespreekte tyd is weer probeer – sonder sukses.
Op ‘n stadium het ek agter in die Landrover gelê op ‘n matras en heelpad “dogbiscuits” geëet. Die laaste aand van die trippie het ons buite Warmbad op die skougronde uitgekamp.
Ons is terug na VTH, klaargemaak met die radio opleiding en toe begin met bestuursopleiding. (Jo-Ann se kommentaar en noem van B&O het my nou laat onthou die kursus was genoem Bestuur en Onderhoud.) In die ses weke het ons nie veel van onderhoud geleer nie.
Met die prakties op die pad onthou ek wel twee insidente. Ek het die Bedford bestuur en teen ‘n opdraand, amper bo-op ‘n bultjie trek die korporaal die handrem op of haal die Bedford uit rat uit en doen alles om my te laat sukkel. Met die is ek deur ‘n nou opening (tussen twee ander groot voertuie) en sit met ‘n stil korporaal vir die res van die tyd wat ek bestuur.
Ons het ook een aand uitgekamp onder die damwal by Hartebeestpoortdam en is van daar af terug basis toe.
Ek het nie my armylisensie gekry nie.

Ander eenhede

Ek is al in 1972 toegewys na 1 Seinregiment, waaroor ek bly was. Aan die begin van die jaar kom ander eenhede se mense om troepe te werf. Ek onthou ook dat die Parabats daar was. Dit klink goed en om te dink jy kan die res van jou armylewe valskerm spring.
Natuurlik het ek (‘n kompulsiewe oefening ontduiker) ook in die tou gaan staan om te kyk of ek daar kan inkom. Gelukkig nie. Ek het later verneem dat die ouens nogal strawwe oefeninge moes doen en deurgaan voor hulle kon spring. Nie vir my nie.

My Army

Ek moet nou diep krap in my gedagtes om hierdie bal te laat rol. Januarie 1973 meld ons aan by die treinstasie agter die Milnerpark skougrond in Braamfontein.

Pa en Ma laai my af en staan seker daar rond en wag vir al die ouens om op die trein te klim. Uiteindelik vertrek ons na bestemming Voortrekkerhoogte.

Daar aangekom is dit eers aantree langs die spoor en daarna loop na 1 Seinregiment wat ons woning sal wees vir die volgende paar weke / maande.

Hare word geskeer,uniforms word uitgedeel, gewere gegee en al die goeters wat ‘n roof maar moet kry. Gelukkig is ek en Berrie (Bernard, ou skoolpêl al van laerskooldae af) in dieselfde Troep en Bungallow. My ander pêl Barry (Bartel) is ook êrens in die kamp. Die kos is maar goor maar eet moet mens eet.

Hier begin my tydlyn alreeds deurmekaar loop. Ek kan nie onthou of die her-eksamen (F vir Wetenskap) of die skietery in dei veld eerste was nie.

Ek het ‘n langnaweek pas gekry om Wetenskap oor te gaan skryf, met die oog op universtiteitsvrystelling, sommer vroeg – sê maar dit was in Januarie dan was die kamp laat Januarie. Ons eerste naweekpas sou eers na ses weke wees.

In elk geval – die eerste kamp. Ons is almal agterop Bedfords gelaai en êrens buite Pretoria gaan aflaai. Slaapplek was tente, gemaak van twee grondseile wat gelas is en waarin twee van ons slaap. Een of ander tyd begin dit reën en die water loop van bo na onder deur ons “tent”. Slaapsakke en klere is papnat. Ek is nie beindruk nie. Met die skietoefeninge neem ek ‘n klip en slaan my bril se een lens stukkend. Die gevolg – na ons terug is by die basis (1 Sein) kry ek weer langnaweekpas om my eie oogarts te besoek vir ‘n nuwe bril.

Nou wag ons almal vir ons eerste amptelike naweekpas.

Begin van ‘n ding

Ek wil ‘n Blog begin met bydraes van mense oor verskillende temas. Daar is altyd bv. stories oor die army dae waarin almal vertel van die skietery en oorlogmaak. Kom ons begin een waar elkeen sy storie kan skryf oor die awol, maniere om by die huis te kom ensovoorts.

Hello world!

Welcome to WordPress.com. This is your first post. Edit or delete it and start blogging!